ONGLE ET ONCLE


    Lo ferm voler qu’el cor m’intra    .    no-m pot ges bècs escoissendre ni ongla   .    de lauzangier qui pert per mal dir s’arma    .    e car non l’aus batr’ab ram ni ab verga    .    sivals a fra lai on non aurai oncle   .   jauzirai joi en vergier o dinz cambra   .

    Quan mi soven de la cambra    .    on a mon dan sai que nuills hom non intra    .   anz me son tuich plus que fraire ni oncle    .   non ai membre no-m fremisca neis l’ongla    .    aissi uom fai l’enfas denant la verga    .    tal paor ai no-l sia trop de l’arma    .

    Del cors li fos non de l’arma    .    e cossentis m’a celat dinz sa cambra   .    que plus mi nafra-l cor que colps de verga    .    car lo sieus sers lai on ill es non intra    .    totz temps serai ab lieis cum carns et ongla    .    e non creirai chastic d’amic ni d’oncle   .

    Anc la seror de mon oncle    .    non amei plus ni tant per aquest’arma   .    c’aitant vezis com es lo detz de l’ongla    .    s’a liei plagués volgr’esser de sa cambra    .    de mi pot far l’amors qu’inz el cor m’intra  .    miells a son vol qu’om fortz de frévol verga    .

    Pois flori la seca verga    .    ni d’En Adam mogron nebot ni oncle   .   tant fin’amors com cela qu’el cor m’intra    .    non cuig fos anc en cors ni eis en arma    .    on qu’ill estei fors en platz o dins cambra    .    mos cors no-is part de lieis tant com ten l’ongla    .

    C’aissi s’enpren e s’en ongla    .    mos cors en lei com l’escorss’ en la verga    .   q’ill m’es de joi tors e palaitz e cambra    .    e non am tant fraire paren ni oncle    .    q’en paradis n’aura doble joi m’arma    .    si ja null hom per ben amar lai
intra   .

    Arnautz tramet sa chansson d’ongl’e d’oncle   .    agrat de lieis que de sa verg’a a l’arma    .    son Desirat cui pretz en cambra intra    .