comment ajouter des auteurs non oulipiens ? ici dire que l’auteur est Guillaume IX ?

Farai un vers de dreit nien              non er de mi ni d’autra gen             non er d’amor ni de joven               ni de ren au               qu’enans fo trobatz en durmen                      sus un chivau

No sai en qual hora.m fui natz                    no soi alegres ni iratz                       no soi estranhs ni soi privatz                       ni no.n puesc au                   qu’enaisi fui de nueitz fadatz                      sobr’un pueg au

No sai cora.m sui endormitz                       ni cora.m veill s’om no m’o ditz                  per pauc no m’es lo cor partitz                   d’un dol corau                       e no m’o pretz una fromitz              per Saint Marsau

Malautz soi e cre mi morir               e re no sai mas quan n’aug dir                     metge querrai al mieu albir              e no.m sai tau                        bos metges er si.m pot guerir                mas non si amau

amigu’ai ieu non sai qui s’es            c’anc no la vi si m’aiut fes                ni.m fes que.m plassa ni que.m pes                       ni no m’en cau                      c’anc non ac norman ni franses                 dins mon ostau

Anc non la vi et am la fort               anc no n’aic dreit ni no.m fes tort              quan no la vei be m’en deport                    no.m prez un jau                   qu’ie.n sai gensor e belazor             e que mais vau

No sai lo luec on s’esta         si es en pueg ho es en pla               non aus dire lo tort que m’a             abans m’en cau                     e peza.m be quar sai rema               per aitan vau

Fait ai lo vers no sai de cui               et trametrai lo a celui                       que lo.m trameta per autrui             enves Peitau              que.m tramezes del sieu estui                   la contraclau